Makeover Session at Estée Lauder's

Estée Lauder–ის მოტრფიალე 21 წლის ასაკში გავხდი, როცა შტატებში მასპინძელ ოჯახში ვცხოვრობდი. ოჯახის დედა, Marlene, თვითონ იყენებდა ამ ბრენდის პროდუქციას და მეც მანებივრებდა კოსმეტიკის ჩანთებით, ფრჩხილის ლაქებით (ლაქების მანია აქამდე მომყვა), სასინჯი სუნამოების ნაირსახეობით, პომადებით, თვალის ჩრდილებით, მაკიაჟის ფუნჯებით... როცა საქართველოში დავბრუნდი, იქედან ჩამოსულებს ჩემთვის სასაჩუქრე პაკეტებს ატანდა, რომლებშიც ისევ ვპოულობდი Estée Lauder–ის პროდუქციას... ინტერნეტის ერამდე ჟურნალებში ვკითხულობდი ესტეს კომპანიის ისტორიის შესახებ სტატიებს, ახლა კი ელექტრონული ფოსტით რეგულარულად ვიღებ ინფორმაციას ერთმანეთზე უკეთესი ახალი პროდუქტების შესახებ.  როცა სტოკჰოლმში სოფომ ერთ დიდ უნივერმაღში წამიყვანა, რასაკვირველია, დაუფიქრებლად მივაშურე "მშობლიურ"  Estée Lauder–ის განყოფილებას. კონსულტანტმა მკითხა, რაიმე კონკრეტულს თუ ეძებთო, დამსვა და დაიწყო...

სახეზე წამისვა შრატი, შემდეგ დღის კრემი და ტონალური, თვალის ირგვლივ – კონცენტრატი, კრემი და ილუმინატორი. მკითხა, ეს თქვენი ბუნებრივი სახის ფერია თუ არაო. მიხვდა, რომ ნამზეური არ მქონდა, მაგრამ მაინც ბოლომდე დარწმუნდა. ტონალურის ფერზე საერთოდ არ დაფიქრებულა, ისე შემირჩია. ტონალურზე ზემოდან თხლად გადამისვა პუდრა და რუჟი. რასაც იყენებდა, დეტალურად აღწერდა, მიხსნიდა, რატომაა სასარგებლო და როგორ უნდა გამოვიყენო. ფუნჯებს გამოყენებამდე სპეციალური სითხით წმენდდა და ხელსახოცით ამშრალებდა. წაკითხულიდან გამახსენდა, თუ როგორ დადიოდა თვითონ ესტე თავის სალონებში და კონსულტანტებს გაკვეთილებს უტარებდა. ჩემი კონსულტანტის პროფესიონალიზმიც ამ ტრადიციის ანარეკლი იყო. პომადისთვის, ჩემდა გასაკვირად, ვარდისფერის საინტერესო ტონალობა შეარჩია. ფერს pink riot ერქვა. დამოუკიდებლად ამ ფერის შეძენას ალბათ ვერ გავბედავდი, მითუმეტეს, რომ მაღაზიებში სასინჯი პომადებით არასდროს ვსარგებლობ. ხელის ზუსტი მოძრაობით, სწრაფად და მქრქალად შემოხაზა კონტური, შემდეგ პომადა წამისვა, ბოლოს კი გლოსი გადაუსვა.

ტაქტი და პროფესიონალიზმი სესიის შემდეგაც შეინარჩუნა. პირდაპირ არ უკითხავს, აბა, რას შეიძენთო. მე ჯერ კიდევ საკუთარ სახეს ვათვალიერებდი სარკეში, სოფო და ლაშა კი კომპლიმენტებს მეუბნებოდნენ. კონსულტანტს მადლობა გადავუხადე, ვუთხარი, რომ ტონალურს ავიღებდი, სხვა პროდუქტებისთვის კი ვიზიტის ბოლოსთვის შევივლიდი.

ასეთი იყო ჩემს საყვარელ ბრენდთან კიდევ ერთი სასიამოვნო შეხვედრა.